أسهم فى روحى

فى رحلة السخنة

على الرمل .. الجميع يبنون قصورا و جسورا و أنا .. أبنى أحزانا من رمل
- ايه اللى بنيتيه ده؟
- ده برج حمام هج الحمام منه
ضحكات عالية كثيرة بعضها لى .. وغصة وحيدة فى قلبى ..


بعد رحلة السخنة بأيام

" و لقيتلك الباص على آخر اليوم بقى كله عصافير كناريا .. اجواز اجواز .. و ليقتلك نفسى زى السمكة فى قفص العصافير .. لوحديييييييييييييي"

منذ شهر تقريبا

ليل و أوضة منسية و سلم داير مندار..و أنا اترك حنينى يعتصرنى على مهل..
مازلت الى الآن عم ألف عناوين مش معروفة لمين .. وورديلن أخبار..
مازلت بانتظار الشمسيات و الأحباب كى ياخدونى بشى نهار ..
مازلت أرى أن فى ناس كتير لكن بيصير ما فى غيره
فيروز تقاسمنى الشاى و الشات
سمكتى تشبهنى .. وحيدة فى حوض زجاجى صغير
" كنت حاسة انى زى السمكة فى قفص العصافير .. لوحدييييييييييييييي"

بعدها بيوم

ماتت السمكة الوحيدة .. يقسم الجميع انها ماتت لأنها كانت مريضة أو لأن الحوض كان بحاجة الى موتور .. وحدى أعلم كم هم مخطئون .. وحدى اعلم انها ماتت من الحنين .

العنوان مستوحى من " كل الطرق تؤدى الى صلاح سالم " - سوزان عليوان