- " تعرفى ان صوت الدموع عالمخدة زى صوت دقات الساعة بالليل؟ "
نظرت الى باشفاق متسائلة فى نفسها عن مستوى الخبل الجديد الذى وصلت له توا..
***************
- " انا بعيط عشان مش عايزة انام "
- " متناميش.."
- " انا بنام عشان محسش بالوقت وهو بيعدى و انا مستنية حاجة انا عارفة انها مش هتحصل"
احتضنتى مواسية و فى عينيها نظرة اعملها ايه دى بس يا ربى؟
***************
- " تعرفى؟ من امبارح للنهاردة محصلش اى حاجة..انا عيطت شوية دموع زيادة و عملت تليفون هيخلينى اعيط شوية قدهم بكرة..بس عارفة؟ من النهاردة لبكرة كل حاجة فى الدنيا ممكن تحصل.. بالمعنى الحرفى لكلمة كل حاجة.."
نظرت طويلا و لم تعلق
***************
- " وبعدين طيب؟ "
- " ولا قبلين ادينا عايشين "
صمتت دهرا و نطقت كفرا
هناك 7 تعليقات:
كل حاجة فى الدنيا ممكن تحصل.. بالمعنى الحرفى لكلمة كل حاجة.."
فعلا
دوام الحال من المحال
يمكن بيمر عليا اوقات كتير صعبه مليانه حزن ودموع
بس بيجي وقت تاني وبيتغير كل دا
تسلم ايدك
استمتعت جدا وانا في البلج
تحياتي
فراشه الشتاء
بين غمضة عين وانتباهتها يغير الله من حال الى حال
علي فكره حلو اوى تعبير بعيط علشان مش عايزه انام
اصعب وااقدم قصه فى التاريخ الانسانى هى انتظار حاجه مش هاتيجى....حقيقى
تحياتى
فراشة الشتاء:
ميرسى لمرورك اوى وادينا فى انتظار الاوقات اللى بيتغير فيها كل ده والدنيا اوضه كبيرة للانتظار زى ما قال جاهين..
********
نبيل:
يسمع منك ربنا و يتغير الحال لحسن دى ضاقت و استحكمت حلقاتها و خنقتنى بصراحة..
جنة
الدنيا جميلة جدا ، لكن احنا بنفسنا اللي بنستسلم للحزن ، صدقيني حياتك ملك ايديكي ، تقدري تشكليها زي مانتي عايزاها ،وفإيدك تخليها سعيده ،رغم عن أنف أي ظروف .
أكتر حاجة تزعلني إني أشوف انسان حزين ، نفسي ألاقي موضوعك الجاي استمتاع بالجمال والحياة والحب ، بسمة وسعادة ، مواقف مضحكة .
يا ريت تكسري المراية اللي اتعودتي تبصي عليها وانتي حزينة ، ابتسمي في أسوء الظروف ، بجد هتحسي بالفرق .
لولا إني مش عايز أزودها كنت كتبتللك كام نكتة هنا .
انا مش هسيب المدونة دي ومستني أقرا ليكي مواضيع كلها سعادة .
ميرسى اوى لمرورك و تمسكك بالمدونة :)
موعدكش بموضوع فيه سعادة قريب اللهم الا اذا كان من باب ان شر البلية ما يضحك..
الفكرة ان الواحد بيفضل يضحك طول الوقت مع انه مكتئب و مش طايق حاجة لحد ما بيوصل لمرحلة انه مش قادر يمثل انه كويس اكتر من كده و محتاج يشيل الضحكة البلاستيك دى و يبكى شوية يمكن يتحسن..
كان فى بوست سعادة كده من غير تمثيل اسمه "وتشعر بالامتنان" اقراه عشان تعرف انى بعرف افرح بردو مش كئيبة دايما يعنى..و زى ما بيقول وجيه عزيز انا مش عاشق ضلمة..ومسير الضى لوحده هيرجع :)
" انا بنام عشان محسش بالوقت وهو بيعدى و انا مستنية حاجة انا عارفة انها مش هتحصل"
بأعمل نفس الحركة يمكن تحايل منى على الزمن
او بأحتاج أبعد فى عالم تانى و أبطل تفكير
المهم مستنية بكرة اللى ممكن فيه اى حاجة تحصل
just me :
و بردو النتيجة بتبقى لحظات اطول من الانتظار ..
إرسال تعليق