الجزء الخامس - على ارتفاع منخفض

- مدام هالة مجتش النهاردة
هذا ما كنت أخشاه .. كنت قد توجهت إلى عمل أمى حسب الخطة الموضوعة ، وكانت هذه الإجابة تحديدا هى أسوأ مخاوفى ..
- طيب ما تكلميها عالموبايل إيه المشكله؟
- مش عايزة لسببين .. الأول إنى مش عايزاه يرد عليا ويعمل فيها زكى رستم فى نهر الحب
- على فكرة بقى إنتى اللى بتشوفى أفلام عربى كتير
- أنا بتكلم فى إحتمال انا عارفة إنه وارد .. مش ببالغ ، وخصوصا إن محدش منهم إتكلم من إمبارح عشان يعرف أنا فين ..


أطرق قليلا ..
- والتانى؟
- إنى محتاجه أبوس إيدها أوى .. عارفه إنها من إمبارح فى جحيم وإن الأيام الجاية هتكون جحيم بردو .. عايزة اتكلم معاها فيس تو فيس ..
نظر إلى بإشفاق ، تلك النظرة التى تحمل دفء حضن طويل ..
- طيب هنعمل إيه دلوقتى؟
- ممممم .. مش عارفة أنا كلمت ريهام قبل ما انزل واتفقت معاها نتقابل الساعة 5 .. كنت فاكره إن فترة الصبح هتبقى كلها مع ماما .. وبعدين كلمنى عن شغلك أكتر؟
- أنا واخد أجازة أسبوع عشان أبقى معاكى لحد ما تستقر أمورك شوية
- أحمد يا حبيبى أنا أمورى مستقرة ومش محت..
- إتلهى
- أنا بتكلم بجد .. وبعدين لاحظ إن إنت حاليا بتصرف عليا ومحتاج شغلك ...
- تانى؟ الخمسة جنيه المقطعه تانى؟ فكك وقفلى عالموضوع ده أنا بعت طلب الأجازة مع عمر النهاردة مات الكلام
آثرت الصمت .. إحترمت عناده لأنه كثيرا ما فعل الشىء نفسه معى .. واحترمت قدرته على تدبر الأمور دون الحاجة لتوجيهاتى
- أقولك ؟ أنا عرفت هنروح فين .. تعالى
ذهبت معه دون أن أدرى إلى أين .. كانت القاعدة الثالثة بدأت تتضح فى ذهنى فأخرجت المفكرة وكتبتها
rule no.3 : love all,trust few,do harm to no one
كانت مقولة شكسبيرية قرأتها قديما .. وكان أحمد ممن أنوى الوثوق بهم .. ولكن ..
rule no.4 : count only on yourslef
فكلما قل ما توقعته من الناس كلما قلت الخيبات التى ستعترضنى ..


- بتكتبى إيه؟
- فاكر القواعد السبعة للرحيل بتاعت احمد العايدى فى أن تكون عباس العبد؟
- آه باين
- بكتب قواعد الرحيل الخاصة بيا
- وكتاب الله مجنونة .. بس بحبك

**************

فى كازينو هادىء على النيل كان يوما الشاهد الأول على حبنا جلسنا .. ولأفسد رومانسية المشهد طلبت منه أن نأخذ الصحف التى أحضرها بناء على طلبى لنتصفحها معا بحثا عن الوظيفة المناسبة ..

- استنى بس قبل ما ندور مش لازم نعرف هندور على إيه؟ وبعدين قبل ده كله أنا عايز أقترح حاجه

- خير؟

- أنا عايز أقابل أبوكى

- ألطم على وشى؟ الراجل قاللى مش هتتجوزيه و مش عاجبك إمشى تقوللى أقابله؟

- اسمعى بس .. إحنا نستنى عليه يومين كمان .. وبعدين أنا أروحله الشغل وأقعد معاه وأقوله إنى بحبك و خايف عليكى و عايز اتجوزك وممكن عملتك السودة تخليه يوافق نتخطب دلوقتى عشان نلم الموضوع وترجعى البيت

- استنى يا كابتن عملتى السودة دا إيه ونلم الموضوع ايه؟ هو انا لا سمح الله فى الشهر التالت وفضيحتى هتبان؟ وبعدين مين قال إنى عايزه أرجع أصلا؟

- بس أنا عايزك ترجعى يا مريم .. مفيش بنت بتسيب بيت أهلها إلا عشان تروح بيت جوزها .. إحنا شرقيين يا ماما

- وأنا مشفتش أب شرقى بيقول لبنته مش عاجبك إمشى

صمت تماما .. وبعد لحظات أضاف:

- طب وامك واخواتك؟ ذنبهم إيه فى الأرف ده كله؟

- اسمعنى يا أحمد عشان تبقى دى آخر مرة نتكلم فى الموضوع ده .. إحنا فى البيت محدش بيقف جمب حد ، أو بمعنى أدق محدش بيقف جمبى .. لما يبقى فى مشكله بينه وبين أى حد فيهم بقف معاهم و بتخانقلهم لكن هما فى مشاكلى بيقفوا يتفرجوا .. من أول أمى لحد أسامة .. وشايفين إن أنا اللى منشفة دماغى ومش عايزة أتنازل .. وأنا ببساطة مش هتنازل لأنى مش طالبة حاجه كتير .. وللمرة الألف بقولك لو الوضع كده مش مناسب ليك كراجل شرقى أنا هفهم وكل واحد يروح لحاله ..

- انتى ملاحظة من ساعة ما سبتى بيت أهلك قلتيلى كام مرة كل واحد يروح لحاله؟

قالها بغضب بارد فأطرقت وأنا أتذكر القاعدة الثالثه .. do harm to no one

بالطبع كان هو آخر من يستحق منى هذا .. أمسكت بكفه الممدود أمامى على الطاولة وضغطته ..

- أنا بحبك .. أرجوووووووك اقبلنى زى مانا .. متحاولش تصلح علاقة بايظة من سنين .. احنا خدنا على كده .. وأنا كده مرتاحه أكتر

- وأنا بقولك مش هنخسر حاجة من المحاولة دى .. أنا معنديش مانع أسمع منه كلمتين بايخين فى سبيل تحسين الوضع .. وخليكى متأكده إنى مش عايز غير مصلحتك قبل أى حاجه ..

- إعمل اللى انت عايزه

قلتها لأنهى هذا الحوار الذى لن يؤدى إلى أى شىء .. كلانا عنيد وكلانا يحترم عناد الآخر ..

بدأنا نتصفح الوسيط كبداية .. ووجدنا عددا من الوظائف المناسبة .. وفى المفكرة إياها وضعت الهواتف و أسماء الوظائف ..

العمل كمندوبة مبيعات لإحدى شركات المعدات الطبية يبدو مناسبا للمرحلة .. فهو ليس بعيد عن مجال دراستى الطبية كما لا يشترط الخبرة .. والعمل بدوام جزئى فى صيدلية لايبدو سيئا لفترة بعد الظهر أيضا .. تمام ..

- فى واحد كان معايا فى الكلية بس أصغر بدفعتين كان قالى ممكن يشوفلى شغل فى فودافون .. أفتكر ده هيكون أريح من التنطيط بين العيادات .. ولا انت ايه رأيك؟

- فودافون؟ مش عارف .. هو أريح طبعا .. وماله نكلمه نقوله لو عايزه

- أنا عايزة اخلص من موضوع الشغل ده بسرعة عشان عايزة أسيب بيت رنا و سلمى

- انتى استحليتى سيبان البيوت ولا ايه؟ تسيبيهم ليه ان شاء الله؟ ضايقوكى فى حاجة؟
- بالعكس خالص بس أكيد مش هينفع أعيش معاهم للأبد يعنى .. عايزة أدور على شقة إيجار جديد بس حاجه فى الحنين عشان متاكلش مرتبى .. عموما واحدة واحدة زى الكناريا .. نطير على ارتفاع قليل الأول ..

- كناريا؟

حكيت له هوسى بقصة الكنارى التى تسكننى فأعاد على ما يقوله حاليا بمعدل 50 مرة يوميا .. أننى مجنونة وأنه يحبنى !!